കോഴിക്കോട്: വെള്ളിമാടുകുന്ന് ചില്ഡ്രന്സ് ഹോമില് നിന്ന് കാണാതായ ഒരുപെണ്കുട്ടിയെ കൂടി കണ്ടെത്തി.മൈസൂരിലെ മാണ്ഡ്യയില് നിന്നാണ് പെണ്കുട്ടിയെ കണ്ടെത്തിയത്.തന്റെ ഒപ്പമുണ്ടായിരുന്നവര് ഗോവയ്ക്കു പോയിട്ടുണ്ടാകാമെന്നാണ് പിടിയിലായ പെണ്കുട്ടി പൊലീസിനോട് പറഞ്ഞത്. കാണാതായ ആറ് പെണ്കുട്ടികളില് ഒരാളെ ഇന്നലെ ബെംഗളൂരുവില് നിന്ന് കണ്ടെത്തിയിരുന്നു. ഇനി നാല് കുട്ടികളെ കൂടി കണ്ടെത്താനുണ്ട്.
ബുധനാഴ്ച്ച വൈകിട്ടാണ് വെളളിമാടുകുന്നിലെ ചില്ഡ്രന്സ് ഹോമില് നിന്ന് ആറ് പെണ്കുട്ടികളെ കാണാതായത്. അടുക്കള വഴി പുറത്തേക്ക് ഏണിവച്ച് കയറി ഇവര് രക്ഷപ്പെട്ടെന്നാണ് സൂചന. സിസിടിവി ദൃശ്യങ്ങള് കേന്ദ്രീകരിച്ചായിരുന്നു അന്വേഷണം. കാണാതായവരില് ആദ്യത്തെ കുട്ടിയെ ബംഗളൂരുവിലെ മടിവാളയില് നിന്നാണ് കണ്ടെത്തിയത്. ട്രെയിന് മാര്ഗമാണ് ഇവര് ബെഗളൂരുവില് എത്തിയത് എന്ന് പൊലീസ് പറയുന്നു. മടിവാളയില് എത്തിയ കുട്ടികള് മലയാളികള് നടത്തുന്ന ഒരു ഹോട്ടലില് മുറിയെടുക്കാന് ശ്രമിച്ചു. സംശയം തോന്നിയ ജീവനക്കാര് കുട്ടികളോട് തിരിച്ചറിയല് കാര്ഡ് അടക്കമുള്ള രേഖകള് ആവശ്യപ്പെട്ടു. രേഖകളില്ലാത്തതിനെ തുടര്ന്ന് രക്ഷപെടാന് ശ്രമിച്ചതോടെ ഹോട്ടല് ജീവനക്കാര് തടയുകയും പൊലീസില് വിവരമറിയിക്കുകയുമായിരുന്നു.