LIVE KERALA NEWS

തിരുവനന്തപുരം: സംസ്ഥാനത്തിന്റെ ധനസ്ഥിതിയുമായി ബന്ധപ്പെട്ട് നിയമസഭയില്‍ മുന്‍ പ്രതിപക്ഷ നേതാവ് രമേശ് ചെന്നിത്തല നടത്തിയ വിമര്‍ശനത്തിന് അതേ ഭാഷയില്‍ തിരിച്ചടിച്ച് ധനമന്ത്രി കെഎന്‍ ബാലഗോപാല്‍. മുടിഞ്ഞവരുടെ കൈയിലല്ല കേരളമെന്ന് പറഞ്ഞ കെഎന്‍ ബാലഗോപാല്‍, കേരളത്തെ ജനം ഏല്‍പ്പിച്ചത് ഇടതുപക്ഷത്തിന്റെ കൈകകളിലാണ്. ഓണത്തിന് ഒരു കുറവും ഉണ്ടാവില്ലെന്നും മാവേലി വന്ന് സന്തോഷത്തോടെ മടങ്ങിപ്പോകുമെന്നും അദ്ദേഹം പറഞ്ഞു.

സാമ്പത്തിക പ്രതിസന്ധിക്ക് കാരണം കേന്ദ്ര സര്‍ക്കാരിന്റെ നിലപാടാണെന്ന് ധനമന്ത്രി കുറ്റപ്പെടുത്തി. കിട്ടികൊണ്ടിരുന്ന പണം കേന്ദ്ര സര്‍ക്കാര്‍ വെട്ടി കുറച്ചു കൊണ്ടിരിക്കുകയാണ്. കിഫ്ബിവായ്പ എടുക്കുന്നതും സംസ്ഥാനത്തിന്റെ വായ്പയായി കാണുന്നു. വിഴിഞ്ഞം തുറമുഖത്തിന് കടമെടുത്താലും അത് സര്‍ക്കാരിന്റെ കടമായി കണക്കാക്കുന്നു. പുതുപ്പള്ളിയില്‍ പ്രസംഗിച്ചില്ലെങ്കിലും ഇക്കാര്യങ്ങള്‍ പൊതുവില്‍ പ്രതിപക്ഷം പറയണം. കേന്ദ്രത്തിന്റെ നയങ്ങള്‍ക്കെതിരെ സംസാരിച്ചില്ലെങ്കില്‍ കേരളത്തിലെ ജനങ്ങള്‍ വെറുതെ വിടില്ല. സിവില്‍ സപ്ലൈസ് വകുപ്പും ധനകാര്യ വകുപ്പും തമ്മില്‍ തര്‍ക്കം ആണെന്നാണ് പ്രതിപക്ഷം പ്രചരിപ്പിക്കുന്നത്. ഇത് ഇല്ലാക്കഥയാണെന്നും ബാലഗോപാല്‍ പറഞ്ഞു.