ഫേസ്ബുക്കിന് രണ്ട് വശമുണ്ട്. അതിന്റെ നല്ല വശവും ചീത്തവശവും അനുഭവിക്കുന്നയാളാണ് ഞാൻ. എന്നെപ്പോലെയുള്ള താരങ്ങൾക്ക് ഫേസ്ബുക്ക് കൊണ്ട് കുറേ ഉപകാരങ്ങൾ ഉണ്ട്. എന്റെ പ്രോജക്ടുകളെക്കുറിച്ച് അപ്ഡേറ്റ് ചെയ്യാം. പിന്നെ എന്റെ പ്രോഗ്രാമുകൾ ആളുകളിലേക്ക് എത്തിക്കാനും ഫേസ്ബുക്ക് സഹായിക്കുന്നുണ്ട്. താരങ്ങൾക്ക് പൊതുജന ശ്രദ്ധ അത്രയ്ക്ക് ആവശ്യമാണ്. പിന്നെ ഫേസ്ബുക്കുകൊണ്ടുള്ള ഉപദ്രവം കമന്റുകളാണ്. ഞാൻ ഒരു പോസ്റ്റിട്ടാൽ അതിനെ ചീത്തവിളിച്ചുകൊണ്ട് കമന്റിടുന്നവരുണ്ട്. എപ്പോഴും നമ്മളെ പുകഴ്ത്തി പറയണം എന്ന് ഞാൻ പറയില്ല. പക്ഷേ മനുഷ്യൻ എന്ന പരിഗണന പല കമന്റുകളിലും കാണാറില്ല. മാനസികമായി വേദനിപ്പിക്കുന്ന തരത്തിലുള്ള കമന്റിടുന്നത് ശരിയല്ലെന്ന അഭിപ്രായമുണ്ട്.
എന്റെ ഒഫിഷ്യൽ പേജ് കൈകാര്യം ചെയ്യുന്നത് എന്റെ ഒരു സുഹൃത്താണ്. ഞാനും ഫോട്ടോകൾ പോസ്റ്റിടാറുണ്ട്. പല ആളുകളുടെയും കമന്റുകൾക്ക് ഞാൻ മറുപടി കൊടുക്കാറുണ്ട്. അത്രത്തോളം ആളുകളോട് ഞാൻ ഫ്രണ്ട് ലിയാണ്. എന്നുകരുതി എപ്പോഴും മറുപടി കൊടുക്കാൻ സാധിക്കാറില്ല. അപ്പോൾ ചിലർ എന്റെ ഫോട്ടോകൾക്ക് മോശമായി കമന്റിടും. ഇവളുടെ ഫോട്ടോ എന്തിന് കൊള്ളാം എന്നൊക്കെയാണ് കമന്റ് . ചിലർ എല്ലാ താരങ്ങളെയും അടച്ച് അധിക്ഷേപിക്കും. ഞാൻ അങ്ങനെയുള്ളവരെ ബ്ലോക്ക് ചെയ്യും. പലരുടെയും തറ സ്വഭാവമാണ് ഫേസ്ബുക്കിൽ കാണുന്നത്. ഇവരൊക്കെ സ്വന്തം വീട്ടിൽ എങ്ങനെയാവും എന്നാണ് ഞാൻ ആലോചിക്കുന്നത്. എനിക്ക് മാത്രമല്ല എന്റെ സുഹൃത്തുക്കൾക്കും ഇതേ അനുഭവമുണ്ട്. പറയാൻ പറ്റാത്തത്ര വൃത്തികേടുകൾ പോസ്റ്റ് ചെയ്യുന്നത് എന്തോ മാനസികരോഗത്തിന്റെ പ്രശ്നമാണ്. ഇങ്ങനെയുള്ള കമന്റുകൾ കൂടിയപ്പോൾ ഞാൻ സൈബർ സെല്ലിൽ പരാതി കൊടുത്തു. അതിൽ പിന്നെ ഇത്തരം ഫോട്ടോ കമന്റുകൾ വന്നിട്ടില്ല.