ന്യൂഡല്ഹി: സംഝോത എക്സ്പ്രസ് സ്ഫോടനക്കേസില് മുഖ്യപ്രതി സ്വാമി അസീമാനന്ദയടക്കം നാലു പ്രതികളെയും കോടതി വെറുതെ വിട്ടു. പഞ്ച്കുളയിലെ എന്ഐഎ കോടതിയുടേതാണ് വിധി. പ്രതികള്ക്കെതിരെ കുറ്റം തെളിയിക്കാന് പ്രോസിക്യൂഷനായില്ലെന്ന് പ്രത്യേക എന്.ഐ.എ കോടതി വിധിച്ചു.
സംഝോത എക്സ്പ്രസ് സ്ഫോടനത്തിന്റെ മുഖ്യസൂത്രധാരനെന്ന് കാട്ടി എന്.ഐ.എ കുറ്റപത്രത്തില് പ്രതിചേര്ത്ത സ്വാമി അസീമാനന്ദ, കൂട്ടുപ്രതികളായ ലോകേഷ് ശര്മ്മ, കമല് ചൌഹാന്, രജീന്ദര് ചൌധരി എന്നിവരെയാണ് കോടതി വെറുതെവിട്ടത്.
2007 ഫെബ്രുവരി 18-ന് സംഝോത എക്സ്പ്രസ് ഹരിയാനയിലെ പാനിപ്പട്ടില് എത്തിയപ്പോഴുണ്ടായ സ്ഫോടനത്തില് 68 പേരാണു കൊല്ലപ്പെട്ടത്. മരിച്ചവരിലേറെയും പാക് പൗരന്മാരായിരുന്നു.