ബോളിവുഡിലെ തലതൊട്ടപ്പന്മാരിൽ പ്രധാനിയായ അമിതാബച്ചന്റെ മകനായിട്ടൊന്നും ഒരു കാര്യവുമില്ലെന്നാണ് നടൻ അഭിഷേക് ബച്ചൻ പറയുന്നത്. സിനിമകൾ വിജയിക്കുമ്പോൾ വാനോളം ഉയർത്താൻ ഒരുപാടുപേരുണ്ടാകും. പരാജയപ്പെട്ടാലോ നമ്മൾ വിളിച്ചാൽ പോലും ആരും ഫോണെടുക്കില്ല. അടുത്തടുത്ത് പരാജയ ചിത്രങ്ങളുണ്ടായാൽ മനുഷ്യനെന്ന പരിഗണന പോലും നൽകാതെ നശിപ്പിക്കാൻ മുന്നിട്ടിറങ്ങുന്നവരാണ് ഏറെയുമെന്ന് അടുത്തിടെ നൽകിയ ഒരഭിമുഖത്തിൽ അഭിഷേക് തുറന്നുപറയുന്നു.
നിങ്ങളുടെ ചിത്രങ്ങൾ പരാജയപ്പെട്ടാൽ ഒരാളും നിങ്ങളുടെ ഫോൺകോൾ സ്വീകരിയ്ക്കില്ല, നിങ്ങൾ ഇനി ഏത് ബോളിവുഡ് സൂപ്പർ താരത്തിന്റെ മകനായാലും ഈ അവസ്ഥയ്ക്ക് മാറ്റം ഉണ്ടാകില്ലെന്നും അഭിഷേക് ബച്ചൻ പറയുന്നു. സിനിമയുടെ പരാജയത്തിന് ശേഷം താരങ്ങള് എത്രത്തോളം അപമാനിയ്ക്കപ്പെടുകയും ഒറ്റപ്പെടുകയും ചെയ്യുന്നുവെന്നതിന്റെ തുറന്നുകാട്ടലാവുകയാണ് അഭിഷേക് ബച്ചന്റെ വാക്കുകൾ. കരിയറിലുടനീളം ഒട്ടേറെ പരാജയ ചിത്രങ്ങളുടെ ഭാഗമാകേണ്ടി വന്ന നടനാണ് അഭിഷേക് ബച്ചന്. സിനിമ പരാജയപ്പെട്ടാൽ പിറ്റേദിവസം ഉണരുന്നത് പോലും അധിക ശക്തിയാർജ്ജിച്ച് വേണം, ഇല്ലെങ്കിൽ പലരുടേയും ചോദ്യം പോലും നേരിടാൻ പ്രയാസമാകുമെന്നും അഭിഷേക് പറയുന്നു. സിനിമ കൂട്ടുത്തരവാദിത്തമുള്ള ഒന്നാണ്. എന്നിരുന്നാലും സിനിമ പരാജയപ്പെട്ടാൽ എല്ലാ പഴിയും കേൾക്കേണ്ടിവരുന്നത് നായകന് മാത്രമാണെന്നും ജൂനിയർ ബച്ചൻ പറയുന്നു.