LIVE KERALA NEWS

ഗസ്സ സിറ്റി: വിശന്നുവലഞ്ഞ് നിൽക്കുന്ന പട്ടിണിപ്പാവങ്ങൾക്ക് നേരേ വീണ്ടും വെടിയുതിർത്ത് ഇസ്രായേൽ സേന. ഗസ്സയിൽ ഭക്ഷണം തേടി വന്ന 71 പേരെ കൂടി ഇസ്രായേൽ സേന വെടിവെച്ച്​ കൊന്നു. ഇരുനൂറിലേറെ പേർക്ക്​ പരിക്കേറ്റതായി റിപ്പോർട്ട്. സ​ഹാ​യ​വി​ത​ര​ണ വാ​ഹ​ന​ങ്ങ​ൾ കാ​ത്തു​നി​ന്ന ജ​ന​ക്കൂ​ട്ട​ത്തി​ന് നേ​രെ വിവിധ കേന്ദ്രങ്ങളിൽ ആസൂത്രിതവെടിവെപ്പായിരുന്നു​ നടന്നത്​. പലർക്കും തലക്കും നെഞ്ചിലുമാണ്​ വെടിയേറ്റതെന്ന്​ ദൃക് സാക്ഷികൾ അറിയിച്ചു. അമേരിക്കൻ പങ്കാളിത്തത്തോടെ ഇസ്രായേൽ നടപ്പാക്കിയ ഗസ്സ ഹ്യുമാനിറ്റേറിയൻ ഫൗണ്ടേഷൻറെ ഭക്ഷ്യവിതരണ കേന്ദ്രങ്ങൾ​ നിത്യവും ഫലസ്തീൻ കുരുതിനിലങ്ങളായി മാറുന്നതിനെതിരെ വ്യാപക പ്രതിഷേധമാണ്​ ഉയരുന്നത്​.

ഗസ്സയിലെ ഭക്ഷ്യവിതരണത്തിന്​ ചുമതല​പ്പെടുത്തിയ ഗസ്സ ഹ്യുമാനിറ്റേറിയൻ ഫണ്ടേഷന്​ എന്ത്​ മുൻകാല അനുഭവപരിചയമാണുള്ളതെന്ന്​ വ്യക്​തമാക്കണമെന്ന്​ യു.എസ്​ സ്​റ്റേറ്റ്​ സെക്രട്ടറി മാർകോ​ റൂബിയോക്ക്​ നൽകിയ കത്തിൽ 93 ഡമോക്രാറ്റിക്​ പ്രതിനിധികൾ ആവശ്യപ്പെട്ടു. ഗസ്സയിലെ സ്ഥിതി നിരീക്ഷിക്കാനും ഭാവി നടപടി സ്വീകരിക്കാനും അമേരിക്കയുടെ പശ്​ചിമേഷ്യൻ പ്രതിനിധി സ്റ്റിവ്​ വിറ്റ്​കോഫ്​ ഇന്ന്​ ഇസ്രായേലിൽ എത്തും.

ഗസ്സയിൽ പൂർണതോതിൽ സഹായം ഉറപ്പാക്കാതെ വെടിനിർത്തൽ ചർച്ചക്കില്ലെന്ന്​ ഹമാസ്​ അറിയിച്ചതായി ഇസ്രായേൽ ഉദ്യോഗസ്ഥരെ ഉദ്ധരിച്ച്​ ‘ജറൂസലം പോസ്റ്റ്​’ റിപ്പോർട്ട്​ ചെയ്തു.ഗസ്സയിൽ ​ഏഴു പേർ കൂടി മരണത്തിന്​ കീഴടങ്ങിയതോടെ പട്ടിണി കാരണം കൊല്ലപ്പെട്ടവരുടെ എണ്ണം 154 ആയി. സ്വതന്ത്ര ഫലസ്തീൻ രാഷ്ട്രത്തെ പിന്തുണക്കാനുള്ള ഫ്രാൻസിൻറെയും ബ്രിട്ടൻറെയും നീക്കം ഹമാസിന്​ കൂടുതൽ ഉത്തേജനം പകരുമെന്ന്​ ഇസ്രായേൽ വിദേശകാര്യ മന്ത്രി ഗിഡിയോൻ സാർ കുറ്റപ്പെടുത്തി. വെ​ടി​നി​ർ​ത്ത​ലി​ന് ഇ​സ്രാ​യേ​ൽ സ​മ്മ​തി​ച്ചി​ല്ലെ​ങ്കി​ൽ സെ​പ്റ്റം​ബ​റി​ൽ ഫ​ല​സ്തീ​ൻ രാ​ഷ്ട്ര​ത്തെ അം​ഗീ​ക​രി​ക്കു​മെ​ന്ന് ബ്രി​ട്ട​ൻ ക​ഴി​ഞ്ഞ​ദി​വ​സം പ്ര​ഖ്യാ​പി​ച്ചി​രു​ന്നു.