LIVE KERALA NEWS

ചുംബന വിവാദത്തിന് പിന്നാലെ പരിഹസിച്ചവരെ മൈഡന്‍ഡ് ചെയ്യാതെ ഗായകന്‍ ഉദിത് നാരാണന്‍ സ്ഥലം വിട്ടു. വിവാദ ചുംബനത്തിന് ശേഷം ആദ്യമായി പൊതുവേദിയില്‍ എത്തിയതായിരുന്നു ഉദിത് നാരായണന്‍. ‘ദ റോഷന്‍സ്’ എന്ന ഡോക്യുമെന്ററി സീരീസിന്റെ വിജയാഘോഷത്തില്‍ പങ്കെടുക്കാനെത്തി ഫോട്ടോക്ക് പോസ് ചെയ്യവെ ‘സര്‍ നമുക്കൊന്ന് ചുംബിച്ചാലോ’ എന്നാണ് ചിലര്‍ ചോദിച്ചത്. എന്നാല്‍ ഒന്നും പറയാതെ ചിരിച്ചുകൊണ്ട് ഉദിത് നാരായണ്‍ സ്ഥലം വിട്ടു. സംഭവത്തിന്റെ വിഡിയോ വൈറലായതോടെ നിരവധി പേരാണു പ്രതികരണങ്ങളുമായി എത്തുന്നത്. ഉദിത് നാരായണനെ വിമര്‍ശിച്ചും അനുകൂലിച്ചും നിരവധി പേര്‍ രംഗത്തെത്തി.

ആഴ്ചകള്‍ക്കു മുന്‍പായിരുന്നു ഗായകനെ വിവാദത്തിലാക്കിയ സംഭവം നടന്നത്. ലൈവ് സംഗീതപരിപാടിക്കിടെ സെല്‍ഫിയെടുക്കാനെത്തിയ സ്ത്രീയെ അവരുടെ അനുവാദം കൂടാതെ ഉദിത് ചുംബിക്കുകയായിരുന്നു. സംഭവം ചര്‍ച്ചയായതോടെ ഗായകന്റെ ചില പഴയ വിഡിയോകളും പുറത്തുവന്നു. മുന്‍നിരഗായികമാരായ ശ്രേയ ഘോഷാല്‍, അല്‍ക്ക യാഗ്‌നിക് തുടങ്ങിയവരെ ഉദിത് നാരായണ്‍ ചുംബിക്കുന്ന രംഗങ്ങളായിരുന്നു അവ.

വിഷയത്തില്‍ വിശദീകരണവുമായി ഉദിത് നാരായണ്‍ രംഗത്തെത്തിയിരുന്നു. ഗായകര്‍ മാന്യതയോടെ പെരുമാറുന്ന ആളുകളാണെന്നും ആരാധകരുടെ സ്‌നേഹപ്രകടനത്തെ പെരുപ്പിച്ചു കാണിക്കേണ്ട ആവശ്യമില്ലെന്നും ചിലപ്പോള്‍ അവര്‍ ഉന്മാദികളെപ്പോലെയാണെന്നും ഉദിത് പ്രതികരിച്ചു. പലപ്പോഴും ഗായകര്‍ ചില സ്‌നേഹപ്രകടനങ്ങള്‍ പ്രോത്സാഹിപ്പിക്കാറുണ്ട്. ചുംബനം കേവലമൊരു സ്‌നേഹപ്രകടനത്തിന്റെ ഭാഗമായി കണ്ടാല്‍ തീരാവുന്ന പ്രശ്‌നമേയുള്ളുവെന്നാണ് ഉദിത് നാരായണന്റെ പക്ഷം. അങ്ങനെയല്ലെന്നും അനുവാദമില്ലാതെ ഒരാളെ ഏകപക്ഷീയമായി ചുംബിച്ചത് ശരിയല്ലെന്നുമാണ് സോഷ്യല്‍ മീഡിയയിലെ ഭൂരിപക്ഷ പ്രതികരണം.