LIVE KERALA NEWS

ശ്രീ നഗര്‍: ജമ്മു കശ്മീരില്‍ പൊലീസ് ഉദ്യോഗസ്ഥനെ ആള്‍ക്കൂട്ടം മര്‍ദ്ദിച്ച് കൊലപ്പെടുത്തി. ജാമിയ മസ്ജിദില്‍ സുരക്ഷ ചുമതലയുള്ള അയൂബ് പണ്ഡിത് എന്ന ഉദ്യോഗസ്ഥനെയാണ് ആള്‍ക്കൂട്ടം മര്‍ദ്ദിച്ച് കൊലപ്പെടുത്തിയത്. പ്രദേശത്ത് പൊലീസ് വെടിവെപ്പില്‍ മൂന്ന് പേര്‍ക്ക് പരിക്കേറ്റു.
സ്വയം രക്ഷയ്ക്ക് വേണ്ടി കൊല്ലപ്പെട്ട പൊലീസ് ഉദ്യോഗസ്ഥന്‍ ആള്‍ക്കൂട്ടത്തിനു നേരെ വെടിയുതിര്‍ത്തതാകാം എന്നാണ് കരുതുന്നത്. കൊല്ലപ്പെട്ട ഉദ്യോഗസ്ഥന്റെ ഔദ്യോഗിക തോക്ക് കാണാനില്ല. യൂനിഫോമിലല്ലാത്തതിനാല്‍ വൈകിയാണ് പൊലീസ് അയൂബിനെ തിരിച്ചറിഞ്ഞത്. അയൂബിനൊപ്പം മറ്റു പൊലീസുകാര്‍ ഉണ്ടായിരുന്നോ എന്നതിനെ സംബന്ധിച്ച് വ്യക്തതയില്ല.
ജൂണില്‍ ലഷ്‌കര്‍ കമാന്‍ഡര്‍ ജൂനൈദ് മറ്റുവിന്റെ കൊലപാതകത്തെ തുടര്‍ന്ന് പൊലീസ് സ്റ്റേഷനു നേരെ ആക്രമണം ഉണ്ടായിരുന്നു. ഇതിനു പിന്നാലെയാണ് സുരക്ഷ ചുമതലയിലുണ്ടായിരുന്ന ഉദ്യോഗസ്ഥനെ ആള്‍ക്കൂട്ടം കൊലപ്പെടുത്തിയത്. സംഭവത്തെ തുടര്‍ന്ന് പ്രദേശത്തെ ഏഴ് പൊലീസ് സ്റ്റേഷനുകളുടെ സുരക്ഷ ക്രമീകരങ്ങള്‍ ശക്തമാക്കി.ബുധനാഴ്ച്ച സെെന്യവുമായുള്ള ഏറ്റുമുട്ടലില്‍ മൂന്ന് ലഷ്കര്‍ ഭീകരര്‍ കൊല്ലപ്പെട്ടിരുന്നു.