LIVE KERALA NEWS
Sunday 19. Oct 2025
ലക്‌നൗ: അന്താരാഷ്ട്ര യോഗ ദിനത്തില്‍ ശവാസനം നടത്തി പ്രതിഷേധിക്കാന്‍ കര്‍ഷക സംഘടനകളുടെ തീരുമാനം. കര്‍ഷകരോടുളള കേന്ദ്രസര്‍ക്കാര്‍ അവഗണനക്കെതിരെ സമാധാന രീതിയില്‍ പ്രതിഷേധിക്കാനാണ് ശവാസനം നടത്തുന്നതെന്ന് കര്‍ഷക സംഘടനകള്‍ അറിയിച്ചു. നിലവിലെ കര്‍ഷകരുടെ അവസ്ഥ ശവാസനത്തിന് തുല്യമാണെന്നാണ് കര്‍ഷക സംഘടനകള്‍ അറിയിച്ചു.
അന്താരാഷ്ട്ര യോഗ ദിനത്തില്‍ ലക്‌നൗവില്‍ മോഡി യോഗ പ്രകടനം നടത്തുമ്പോള്‍ രാജ്യവ്യാപകമയി ശവാസനം നടത്താനാണ് കര്‍ഷക സംഘടനകളുടെ തീരുമാനം. മോഡിജി കര്‍ഷകരെല്ലാം മരിച്ചുകൊണ്ടിരിക്കുകയാണ് എന്ന പോസ്റ്ററുകളുമായാണ് കര്‍ഷക സംഘടനകളുടെ പ്രതിഷേധം.
കര്‍ഷക മരണങ്ങള്‍ വര്‍ധിക്കുന്നതില്‍ പ്രതിഷേധിച്ച് പ്രതിരൂപങ്ങളെ നിര്‍ത്തും. ജൂണ്‍ പതിനാറിന് 62 കര്‍ഷക സംഘടനകളുടെ നേതൃത്വത്തില്‍ മൂന്ന് മണിക്കൂര്‍ റോഡ് ഉപരോധിക്കും. കര്‍ഷക പ്രതിനിധികള്‍ രാജ്ഗട്ടിലുളള മഹാത്മാഗാന്ധി സ്മാരകം സന്ദര്‍ശിക്കുമെന്നും അവര്‍ അറിയിച്ചു.
രാജ്യത്തെ ജനങ്ങളോട് തങ്ങളുടെ പരിതാപകരമായ അവസ്ഥയെ കുറിച്ച് പറയുന്നതിന് പ്രചാരണം നടത്തും, സമാധാനപരമായുള്ള തങ്ങളുടെ പ്രതിഷേധം തുടരുമെന്നും അന്താരാഷ്ട്ര യോഗ ദിവസം ശവാസനം നടത്തിയായിരിക്കും ഇത് അവസാനിക്കുകയെന്നും കര്‍ഷകര്‍ അറിയിച്ചു. മോഡി സര്‍ക്കാര്‍ അധികാരമേറ്റ് മൂന്ന് വര്‍ഷം തികയുന്നതിനിടെ കടക്കെണി മൂലം മുപ്പത്താറായിരം കര്‍ഷകര്‍ ആത്മഹത്യ ചെയ്തിട്ടുണ്ടെന്നാണ് കണക്കുകള്‍. ബിജെപി ഭരിക്കുന്ന സംസ്ഥാനങ്ങളായ മധ്യപ്രദേശ്, മഹാരാഷ്ട്ര തുടങ്ങിയ സംസ്ഥാനങ്ങളിലാണ് കര്‍ഷക പ്രക്ഷോഭം ഏറ്റവും ശക്തമായിരിക്കുന്നത്.
കൃഷി നാശം, കാര്‍ഷിക ഉത്പന്നങ്ങളുടെ വിലക്കുറവ്, കടക്കെണി തുടങ്ങിയ പ്രശ്‌നങ്ങളില്‍പ്പെട്ടുഴറുന്ന മഹാരാഷ്ട്രയിലെ കര്‍ഷകര്‍ ഈ മാസം ആദ്യം മുതലാണ് സമരം തുടങ്ങിയത്. ഈ വര്‍ഷം മാത്രം മഹാരാഷ്ട്രയില്‍ 1400 ലധികം കര്‍ഷകര്‍ ആത്മഹത്യ ചെയ്തു എന്നാണ് കണക്കുകള്‍. മധ്യപ്രദേശിലും വിവിധ ആവശ്യങ്ങള്‍ ഉന്നയിച്ച് കര്‍ഷക പ്രക്ഷോഭം നടക്കുകയാണ്. കഴിഞ്ഞ ദിവസം മധ്യപ്രദേശില്‍ കര്‍ഷകര്‍ക്കു നേരെയുണ്ടായ പൊലീസ് വെടിവെപ്പില്‍ അഞ്ചു പേര്‍ കൊല്ലപ്പെട്ടിരുന്നു.
ഹിജാബ് വിവാദത്തിൽ പ്രതികരിച്ച് മുസ്ലിം ലീഗ് ദേശീയ ജനറല് സെക്രട്ടറി…