കാലിഫോർണിയയിലെ ഗുരുദ്വാരയിൽ വെടിവയ്പ്പ്; രണ്ട് പേർക്ക് ഗുരുതര പരിക്ക്

കാലിഫോർണിയ: അമേരിക്കയിലെ കാലിഫോർണിയയിൽ സാക്രമെന്റോ കൗണ്ടിയിലെ ഗുരുദ്വാരയിൽ രണ്ട് പേർക്ക് വെടിയേറ്റു. പരിക്കേറ്റ രണ്ടുപേരുടെയും നില അതീവഗുരുതരമാണെന്നാണ് വിവരം. പ്രാദേശിക സമയം ഉച്ചയ്ക്ക് രണ്ടരയോടെയാണ് വെടിവയ്പ്പുണ്ടായത്. പരസ്പരം അറിയാവുന്ന ആളുകൾ തമ്മിൽ പ്രശ്‌നം വെടിവയ്പ്പിൽ കലാശിക്കുകയായിരുന്നുവെന്ന് പോലീസ് പറയുന്നു. സംഭവത്തിന് പിന്നാലെ അക്രമികളിൽ ഒരാൾ ഓടി രക്ഷപെട്ടു. മറ്റൊരാൾക്ക് വേണ്ടിയുള്ള തിരച്ചിൽ തുടരുകയാണ്.

ഗുരുദ്വാരയിൽ ചില ആഘോഷപരിപാടികൾ നടക്കുന്നതിനാൽ ധാരാളം ആളുകളും ഇവിടെ എത്തിയിട്ടുണ്ടായിരുന്നു. നാല് പേർ തമ്മിലാണ് വഴക്കുണ്ടായത്. ആദ്യം ഇവർ തമ്മിൽ വാക്കേറ്റത്തിൽ ഏർപ്പെടുകയും ഒടുവിൽ തോക്കെടുത്ത് വെടിവയ്ക്കുകയുമായിരുന്നെന്ന് സാക്രമെന്റോ കൗണ്ടി ഷെരീഫ് ഓഫീസ് വക്താവ് അമർ ഗാന്ധി പറഞ്ഞു. പരിക്കേറ്റവരും അക്രമിയും പരസ്പരം അറിയുന്നവരാണെന്നും, നേരത്തേയുള്ള പ്രശ്‌നത്തിന്റെ പേരിലാണ് വെടിവച്ചതെന്നും അദ്ദേഹം പറഞ്ഞു.

© 2024 Live Kerala News. All Rights Reserved.