വാഷിംഗ്ടണ്: രാജ്യത്തെ കോവിഡ് ബാധിതരുടെ എണ്ണം അനിയന്ത്രിതമായി വർധിക്കുന്നതിനിടെ ജനങ്ങളെല്ലാം മാസ്ക് ധരിക്കണമെന്ന് അമേരിക്കന് പ്രസിഡന്റ് ഡോണള്ഡ് ട്രംപ്. സെന്റര് ഫോര് ഡിസീസ് കണ്ട്രോള് ആന്ഡ് പ്രിവെന്ഷന് (സിഡിസി) ഇത് സംബന്ധിച്ച നിര്ദേശങ്ങൾ ഉടൻ നല്കുമെന്നും അദ്ദേഹം പറഞ്ഞു.
സര്ജിക്കല് ഗ്രേഡ് മാസ്കുകള് ലഭ്യമല്ലെന്നും അത് ആരോഗ്യ മേഖലയില് പ്രവര്ത്തിക്കുന്നവര്ക്കായി കരുതി വച്ചിരിക്കുകയാണെന്നും ട്രംപ് വ്യക്തമാക്കി. അതിനാല് വീട്ടില് തന്നെ മാസ്കുകള് നിര്മിച്ച് ഉപയോഗിക്കേണ്ടി വരുമെന്നും മാസ്ക് വയ്ക്കുന്നത് ഓരോരുത്തരും അവരവരുടെ കടമയായി കാണണമെന്നും ട്രംപ് നിര്ദേശിച്ചു.
അതേസമയം, താന് മാസ്ക് ധരിക്കില്ലെന്നും അത് തന്റെ മാത്രം ഇഷ്ടമാണെന്നും ലോകനേതാക്കളെ മാസ്ക് ധരിച്ചുകൊണ്ട് അഭിസംബോധന ചെയ്യാന് തനിക്ക് ആകില്ലെന്നും അദ്ദേഹം പറഞ്ഞു. വൈറ്റ് ഹൗസില് അവലോകന യോഗത്തിനു ശേഷമുള്ള പതിവ് വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.