‘വികസനത്തിന് പണം വേണം’; പെട്രോള്‍ വിലവര്‍ധന ന്യായീകരിച്ച് ധനമന്ത്രി ജെയ്റ്റ്‌ലി; റോഹിങ്ക്യന്‍ അഭയാര്‍ത്ഥി വിഷയത്തില്‍ കേന്ദ്രസര്‍ക്കാര്‍ നിലപാടില്‍ മാറ്റമില്ല

ന്യൂ ഡല്‍ഹി: ഇന്ധന വിലവര്‍ധന ന്യായീകരിച്ച് ധനമന്ത്രി അരുണ്‍ ജെയ്റ്റ്‌ലി. വികസനത്തിന് പണം വേണമെന്ന ‘ന്യായ’മാണ് ബിജെപി സര്‍ക്കാരിന്. വികസന പദ്ധതികള്‍ നടപ്പാക്കാന്‍ പണം വേണമെന്ന കേന്ദ്രസര്‍ക്കാരിന്റെ സ്ഥിരം പല്ലവി ആവര്‍ത്തിച്ചാണ് ഇന്ധന വിലവര്‍ധനയെ ജെയ്റ്റ്‌ലി ന്യായീകരിച്ചത്. അമേരിക്കയില്‍ എണ്ണ സംസ്‌കരണത്തില്‍ ഇടിവുണ്ടായതും വിലകൂടാന്‍ ഇടയാക്കിയെന്ന് ധനമന്ത്രി അവകാശപ്പെടുന്നു.
റോഹിങ്ക്യന്‍ അഭയാര്‍ത്ഥി പ്രശ്‌നത്തില്‍ കേന്ദ്രസര്‍ക്കാര്‍ നിലപാടില്‍ മാറ്റമില്ലെന്നും ധനമന്ത്രി വ്യക്തമാക്കി. റോഹിന്‍ങ്ക്യന്‍ മുസ്ലിം അഭയാര്‍ത്ഥികളെ ഒഴിപ്പിക്കണമെന്ന് കേന്ദ്ര സര്‍ക്കാര്‍ സുപ്രീം കോടതിയെ അറിയിച്ചിരുന്നു. അഭയാര്‍ത്ഥികളെ ഇന്ത്യയിലെത്തിക്കാന്‍ ചില ശക്തികള്‍ പ്രവര്‍ത്തിക്കുന്നുവെന്നും ഇവര്‍ ബംഗാള്‍, ത്രിപുര, മ്യാന്‍മര്‍ എന്നിവിടങ്ങള്‍ കേന്ദ്രീകരിച്ച് പ്രവര്‍ത്തിക്കുന്നുമെന്നുമാണ് കേന്ദ്രം സുപ്രീം കോടതിയെ അറിയിച്ചത്. അഭയാര്‍ത്ഥികള്‍ക്ക് തീവ്രവാദ ബന്ധമുണ്ടെന്നാണ് കേന്ദ്രസര്‍ക്കാരിന്റെ നിലപാട്. റോഹിങ്ക്യന്‍ അഭയാര്‍ത്ഥികള്‍ക്ക് ഐഎസ്, ഐസ്ഐ ബന്ധമുണ്ടെന്ന നിലപാടില്‍ ഉറച്ചുനില്‍ക്കുന്നുവെന്നാണ് ധനമന്ത്രി ആവര്‍ത്തിച്ചത്.

© 2022 Live Kerala News. All Rights Reserved.