LIVE KERALA NEWS

തിരുവനന്തപുരം: നോട്ട് പ്രതിസന്ധിയിലും സഹകരണമേഖലയിലെ നിയന്ത്രണങ്ങളിലും പ്രതിഷേധിച്ച എല്‍ഡിഎഫിന്റെ ആഭിമുഖ്യത്തില്‍ സംസ്ഥാനത്ത് ഹര്‍ത്താല്‍ ആരംഭിച്ചു. ആദ്യമണിക്കൂറില്‍ അക്രമസംഭവങ്ങള്‍ റിപ്പോര്‍ട്ട് ചെയ്തിട്ടില്ല. കെ.എസ്.ആര്‍.സി ഭാഗികമായി സര്‍വീസ് നടത്തുന്നുണ്ടെങ്കിലും സ്വകാര്യ ബസുകളാന്നും സര്‍വീസ് നടത്താത്തത് യാത്രക്കാരെ വലച്ചിട്ടുണ്ട്. അതേസമയം, യുഡിഎഫിന്റെ രാജ്ഭവന്‍ മാര്‍ച്ചും ഇന്ന് നടക്കും. ഒപ്പം, നോട്ട് പിന്‍വലിക്കലിന് എതിരെ പ്രതി പക്ഷ പാര്‍ട്ടികള്‍ ദേശ വ്യാപകമായി പ്രതിഷേധിക്കും. നോട്ട് പിന്‍വലിക്കലിന് എതിരെ ഇന്നും പാര്‍ലമെന്റ് പ്രക്ഷുബ്ധമാകുമെന്നാണ് സൂചന. രാവിലെ ആറ് മുതല്‍ വൈകിട്ട് ആറു വരെയാണ് ഹര്‍ത്താല്‍ പതിവ് പോലെ തന്നെ തിരുവനന്തപുരം, കൊച്ചി, കോഴിക്കോട് തുടങ്ങി മൂന്ന് മേഖലകളിലും ജനജീവിതം സ്തംഭിച്ചു. കടകമ്പോളങ്ങള്‍ അടഞ്ഞു കിടക്കുകയാണ്. റെയില്‍വേ സ്‌റ്റേഷനിലും മറ്റും കുടുങ്ങിപ്പോയവര്‍ക്ക് തുണയായി ചില വാഹനങ്ങള്‍ ഓടുകയും ചെയ്തു. നേരത്തേ തന്നെ പ്രഖ്യാപിച്ചിരുന്നതിനാല്‍ നിരത്തുകളിലും ബസ് സ്റ്റാന്റുകളിലും റെയില്‍വേ സ്‌റ്റേഷനിലും മറ്റും തിരക്കുകള്‍ കുറവായിരുന്നു.പിഎസ്്എസി പരീക്ഷകള്‍ക്ക് മാറ്റമില്ല. ആര്‍ബിഐ ആസ്ഥാനത്ത് മുഖ്യമന്ത്രിയുടെ നേതൃത്വത്തില്‍ നടന്ന രാപ്പകല്‍ സമരത്തിന് പിന്നാലെയാണ് എല്‍ഡിഎഫ് ഹര്‍ത്താലിന് ആഹ്വാനം ചെയ്തത്. അതേസമയം ശബരിമല തീര്‍ത്ഥാടകരെയും വിദേശ വിനോദസഞ്ചാരികളെയും തടയരുതെന്ന് നിര്‍ദേശമുണ്ട്. ആശുപത്രി, പാല്‍, പത്രം, വിവാഹം, ബാങ്കുകള്‍ എന്നിവയെയാണ് ഹര്‍ത്താലില്‍ നിന്നും ഒഴിവാക്കിയിരിക്കുന്നത്.